Berla sain tra cacha ciniu〈l〉 dha dib-seo ⁊ fer cacha berlai dib-sidé ba hé lín na scole ⁊ tri suid ⁊ ro faided cach fer dib fria berla ⁊ ní cach comcheniuil do-chuaidh and dochum a criche don fhoglaim sin acht is cach comberláid, amal ro gab Cái Cáinbrethach, dalta Féiniusa, in dara descipul .lxx. na scole. Bá do Ebrib a bunadus ⁊ ba co hEgeptacdaib ro fóeded, fóbíth is and bátar a thustidi ⁊ ba hand rod n-alt ⁊ tuargabadh badesin as a óetid. Conid de sein as-bert-seom i c⁅h⁆ urp libair: Is cach comberlaid do-chuaid and dochum a chriche ⁊ ni cach comcheneóil . Secht mbliadna dano ro batar na descipail forín cuairt icond oglaim ⁊ .ííí. bliadna doib ic taisbenad a ngresa, í fus iar tiachtain condat .x. mbliadna samlaid. Conid de sein at-beir-seomh tis i curp libair: A cind .x. mbliadan iar scailiud doib on Tur for cach leth do-rebed dóib a mberla-sa. Bai tra coicfiur ar .xx.-it ba huaisliu ⁅ Sliu dib It é a ananmund ⁆ dib. It é a n-anmand-sidé for-atat feda ⁊ tóebomnai ind Ogaim.i. Babél, Lóth, Forand no Fornin, Saliath, Nabcodon, Hiruath, Dauíd, Telamon, K `c´ aí, Kaliab, Moríath, Gad no Gom, Gomer, S `no t´ ru, Rúbén, Achab, Oise, Uríath, Esu, Iochim, Ethrocius, Ordinos ` no -ors ´ , Uimelchus, Iudonius, Eafrim. ⁊ As iad-sin anm⁅u⁆ ann in coicir ar xx ba huaisliu bai i scoil Feniusa. Na coic feada aireagai immorro ín Oghaim is ón choiciur ba `h´ uaislem dib ro hainmnightea: ᚛ᚐᚑᚒᚓᚔ ` a o u e i ´ . As-berat aroili dano it .uíí. feada aireaghdaí immorro in Oghaim filet and ⁊ is on moírsiur ropo uaíslem díb ro hainmnígted ` and ´ ⁊ it é dá fid do-formagar and frisna coíc suas .i. ᚛ᚘᚖ ` euad no or ´ Acus it é feda ⁊ toebomnai ainmnigter ón cóiciur ar .xx. ropo uáislem isin scoil sin Feniusa .i. ᚛ᚁᚂᚃᚄᚅᚆᚇᚈᚉᚊᚋᚌᚍᚎᚏᚐᚑᚒᚓᚔ᚛ᚕᚖᚗᚘᚙ