At-bearait aroile dona hudaraib nach o dainib ro hainmniged feadha in Ogaim isin Gaedeilg acht is o chrandaib gencobad aithnig aniu. Ar atait tri hearnaile ar chrandaib .i. airig fheada ⁊ athaig fhedha ⁊ losa feada ⁊ is uaithib sin ro hainmnigead feada in Ogaim. Airig fheada quidem: dair, coll, cuileand, aball, uinius, iubar, giuis. Athaig fheda immorro: fearn, sail, beithe, leam, crithach, cairtheand, droigen, trom, feoras, crandfir, ethleand, idat, findcholl. Lus feadha .i. aitend, fraech, gilcach, rait. Beithi dano on beithi ro hainmniged ar cosmaileas fri cois beithe ut dicitur: feochas foltcain bethe ⁊ is airi sin is a mbethi ro scribad in cetainm Ogaim tucad in hErind .i. secht mbeithi tucad do Lug mac Eithleand .i. berthair do bean uaid nisi eam custodieris . Uar is airi sin beos scribthair beithi i tosach aibgidreach in Ogaim. Luis dano is o chrund ro hainmniged .i. o chairthend, air is luis ainm in chroind ina `t´ Seangaeidilg ut dicitur li sala .i. cairtheand ar ailleacht datha a chaer. Fearn dano is o chrund ro hainmniged ut dicitur: aer enech fiada fearn ; Fearn fear .i. is di do-gnithe ar na sciatha lasna fianaib. Soil dano is o chrund ro hainmniged, ut dicitur: li mairb soil .i. ar cosmaile as a datha fri marb. Nin dano is o chrund ro hainmniged .i. o uindsind ut dicitur: coscrath sida uinnnis ar is di do-gnithear croind isna gaib triasa coscraidthea ainsith no costud sida uindius .i. garmna uindsend ar is a n-aimsir sida tocbaidthear garmna. Uath dano is o chrund ro hainmniged .i. sce ut dicitur: Comd `a´ l cuan huath .i. sce ar is minic la cach comdail ac sciath no is ad uathmar hi ara dealgaib. Duir dano is o chrund ro hainmniged ut dicitur: arde dosaib dur . Tinde dano is o chrund ro hainmniged .i. o chuileand ut dicitur: trian roith tindi .i. ar is cuilind in treas fid roith in charbaid. Coll dano is o chrund ro hainmniged ut dicitur: caincar fid .i. coll. Queirt dano is o chrund ro hainmniged .i. aball. Muin dano is o chrund ro hainmniged .i. o fhineamain ut dicitur: arde maise muin .i. fineamain. Gort dano is o chrund ro hainmniged .i. eideand ut dicitur: glaisi geltaib gort .i. eideand. Getal dano is o chrund ro hainmniged .i. gilcach no rait ut dicitur: luth leaga getal .i. rait no gilc `a´ ch. Straif dano is o chrund ro hainmniged ut dicitur: aire sraba sraiph .i. droigen. Ruis dano is o chrund ro hainmniged .i. trom ut dicitur: ruamna ruisc .i. trom. Ailm .i. aitend. Ond .i. ocht `a´ ch. Ur .i. fraech. Edad .i. crand fir. Idad .i. ibar ut dicitur: caemfedha ibar . Ebad .i. edlend. Oir .i. feorus. Uillend .i. edlend. Ifin .i. spinan. Anmanda fid tra sin uile amal fo-gabar isna Duilib ⁊ is uaithib ainmnighter fedha in Ogaim ⁊ ni `h´ o dainib. Finit.